牧師吉中鳴噚晚喺旺角麥花臣場館舉行演唱會，張文慈（Pinky）、蔣麗萍、鍾舒淇（Sukie）、王瑋、尹天照、林雅詩來撐場。
張文慈即場宣佈人生大事，佢話：「我要嫁給耶穌。」仲係演唱會上着住婚紗獻唱牧師為佢寫嘅詩歌《甜蜜》，佢話：「平時都有做好多Show同埋啲大型演唱會，嗰啲都唔緊張，但為咗呢個演唱會我緊張到瞓唔到，我爸爸、教會朋友加埋差唔多有成百人嚟咗，我當我自己出嫁，今晚嫁咗畀耶穌就唔代表之後唔會結婚，只係依家我獻咗畀佢先。」
Pinky話今次係夢想成真：「早前祈禱有同主耶穌講想唱首自己嘅詩歌，之後就喺同一個場地睇到李彩華演唱會，覺得個台好靚，好想喺度唱歌，點知無幾耐就收到邀請，簡直係滿足哂我3個願望。」
亞視發展網絡電視平台，Pinky話：「希望呢個圈子可以做到百花齊放，啲員工又有嘢做，係件開心事。」講到佢有份做嘅經典劇《我和殭屍有個約會》重拍，佢話：「我諗拍唔番嗰個味道，始終經典係經典，留番個美好回憶，但如果真係拍，我都會支持！」至於幫手，佢話：「應該唔會，我o依家都簽咗無綫約。」
《我和殭屍有個約會》男主角尹天照知道重拍，有咩感受？「都有收到朋友Send過嚟，話會再重拍。搵我拍，我會拍《我和牧師有個約會》。」