一楼度娘

视频来自：土豆
门前百态
乡下头屋里门前头有条浜兜，叫南泾头，对河是人家屋后头个竹园，递面是自家宅基地上个自留田，种著点芦粟、番麦、毛豆、长生果。河里、河上侪生机盎然，是一块远离城市喧嚣个世外桃源。
塘里氽满个浮薸，田鸡、癞团就伏垃个浮薸上——当然，下头肯定有玄机，要么是野长生果藤上，要么是坍፲塘里个竹头或者树桠枝上，或么是笡笡恁插垃河里个水泥板或者石柱上。叛恁哪恁压得起？一压覅唂咚势nyian漏下去个哦！
田鸡、癞团gah实也是懒胚子，可以一日天伏垃伊个上一动不动，像煞介仔日朝蹲垃老户荡，作兴只有跑过去抄抄Ͳ么会跳个跳、肝个肝。场时也会羓着Ͳ፲吃食个样子，舌头一拖，一舔，一个眼督霎收也收著进去啧。
本来日朝望出去好多只垃许，结果立著秋话一上浪趟侪不看见啧，不晓得ia到何上去啧，像塱theh人家蜪蒃野猫。难般还看见只把癞团攉垃根坍垃河里个树桠枝上，黑贴墨搨，像沰烂污头，蜷垃上一动不动，像煞介仔受著啥个委屈，苦恼得来，滑稽透滑稽透。
歇著一tshian，递排家伙又侪冒出来啧话，原旧一只只伏垃攻击阵位上候好垃许。有日一只癞团蹲垃块高出来个水泥空心砖贴当中，像个皇帝，畀我发现个辰光正好吃着只啥个物事，当然只舌头快快得根本看不清爽。歇著歇儿，不晓得阿是身上糊着著浮薸有点tshie呐还是啥个，只手么面孔上抓抓，只脚么屁股头跈跈，朝前肝著两步，坐不定啧呀！发现癞团身上倒也秃是个表演细菌。
䗌蜓倒是足贯飞来飞去，像不觉着衰惰个，永远是主动出击，不像田鸡、癞团个恁候好垃一滩个。不过也不是所有个品种侪寔恁勤俭个——黄䗌蜓是足贯塱飞，红䗌蜓是我看看也懒uie个，一般侪躲፲水沿面高出来个物事上，像塱发呆。
墈岸上有蟛蜞洞，但南泾头里点蟛蜞话哪恁不像别滩个伊恁活跃，惊难般看见只把红蟛蜞肝垃外头㫰㫰，结果大概畀只白头飞下来一吓么又朽著进去啧。
白头可谓是模范父母，场时看见两只老白头飞到棵koh树上喂两只小白头。小白头毛出得差不多啧，但头倒还不白嘞！原来白头白头也是要等老著嘞“头发”发白。两只小鸟平常脚也不伏垃窠里，就垃棵koh树上跳跳、飞飞、孛相相，爷娘来著么头岳朝天嘴落开著等爷娘喂，爷娘喂好著么又朝东朝西忙得。想想白居易个《鸟》写得是灵：
谁道群生性命微,一般骨肉一般皮。
劝君莫打枝头鸟,子在巢中望母归。
递歇儿头儿若然啥人拿两只老鸟bian bian两枪么实在是叫罪过，罪过……伤阴节个事体还是覅做个好。
当然也有自家来拾食吃个。有趟有只大个水鸟，背心么黑个，肚皮么白个，只肉段么圆骨轮墩个，两只脚么细嘞个长，像两根棒香梗，不晓得阿就是伊种叫起来ghuaoh ghuaoh ghuaoh ghuaoh个水老婆鸡。但看见个辰光么不叫个，只是有心有想个垃塘涂上拾食吃，跑起来么轻哝哝，慢荡荡，像每脚踏下去侪要看一看，想一想，独怕自家个吃头听见著声气畀Ͳ滑脚脱。一只脚提起来个辰光歪也不歪，笡也不笡，重心稳得邪气，真想不通寔恁细只脚上头递段老肝肞哪恁牚得定个？场时头љ下去啄着只啥个物事咽下去，也看不清爽，横人看上去龌龊uie个物事，递排老不打侪要吃个。
来拾食吃个“鸟客”当然不罢递一种，还有白鹭嘞啥别个水鸟，可惜有个名头叫不出。不过递排家伙基本上侪有一排共同特征——嘴长，脚长，肉段壮。还有，佷覅当著Ͳ፲个颜色忒显，有辰光清清爽爽看见Ͳ፲飞过来躲垃何里只位置，但一时头上原还望大不出嘞！麻雀儿、鹁鸪鸪也是常客。麻雀儿横穿来羓去，活灵透活灵透。鹁鸪鸪听倒常庄听见Ͳ“鹁鸪鸪，鹁鸪鸪”叫，足贯垃塱自称呼，但望倒望不大着，蒃得蛮好。场时也看见一两只垃场角上棵木头树上訬孛相，或者垃对河人家屋脊上孤芳自赏。黄伯劳倒也难得看见，难般看见只把么也是像Ͳ一贯个作风个恁躲垃树头顶上“喍啦喍啦”叫脱两声么又飞脱啧。
除脱仔天上飞个，当然还有地下肝个。不过话肝么像有点委屈Ͳ፲，Ͳ፲毕竟也是号称动物界个贵族——哺乳动物，通俗个讲么就是吃奶个动物，拆穿仔讲么就是兽类。不过好像门前头个走兽也不多，无非就是阿猫儿阿狗。
有一日，一只白脚虎皮猫从塘浒上朝后跑过来。话白脚虎皮猫么gah实就是只黄颜色个竹节猫儿，就是身上个纹路像竹头个节头个恁一路一路个。只黄竹节打点芦粟里钻过来，钻到点毛豆里，乃么再从点毛豆里钻到场上歇垃许个部车子底下。我当Ͳ还要打场上跑过来嘞，结果话攉牢著车子边头狭哝哝个阴头里朝西过去啧。个歇儿头儿终㫰饭时里，日头当头顶，个嘞车子边头荫小uie个。Ͳ终本来要想到屋檐底下来个，跑也跑到车子北带边啧，结果一看还有好多步路，外加光场滑地，日头辣辣较晒垃上，ⴳ荫也呒mae，个嘞不上啧。
乃么挨下来还要滑稽嘞，Ͳ攉垃阴头里跑到车子西横头，一看，也是日头辣辣较，连忙三步并两步豪✶要紧跑到场角上只水斗个阴头里，弓耸弓耸滑稽透滑稽透。等到著阴头里乃么又笃定啧，慢叨叨跑到西带面个芋艿田里。Ͳ终也识货芋艿芜ⴳ荫大，蹲垃里乡阴凉个。递记真颠覆著猫儿邋我心里个无畏形象——传说中天不怕地不怕个喵星人，连当鳄鱼也敢替Ͳtshan tshan两记耳光扇下去嘞竟然也会怕热个！不过想想也是，像人一样，绕佷杀横得五斤狠六斤，大伏里日头底下去晒个一日天足贯也降不住个。
还有一日，对河有只白猫儿，跑到塘涂上仆下来静静较个观察。我想好戏来啧！讲不定有能看见猫儿捉鱼个精彩演出！乃么我盯牢定Ͳ，独看见只猫儿头埋下去嗅著嗅。沿皮头氽著一层浮薸，稀个许墩有块白敷敷个物事。只猫儿拿块物事攋著攋，头љ下去一衔zih——哦，原来是条死鱼！乃么Ͳ衔著条死鱼肝到岸上乡，独个子享用去啧。歇著一歇儿，只猫儿吃罢著又回到头先衔死鱼个塘涂上，又伏垃伊个上，像煞介仔还要等著死鱼氽来嘞！老法人话“时来运来，烧熟狗头氽来。”我塱想我阿要也去伏垃个南泾头上，等等看烧熟狗头阿会得自家氽来。
结果烧熟狗头朆氽来，倒是有只“生狗”自家跑著来啧——自然是生个，烧熟著么也不会跑个啧。不晓得几时头儿来著只流浪狗，乃是日朝吃困垃我伲上。怖么怖得惊要死，灰薄落托，共总稀敞敞三两根癞毛，一只脚么折个，终畀人家厾脱个。到著我伲上么门口头破沙发上捎捎，场上乡车子底下蹲蹲，门前头田里乡钻钻。我几趟看见Ͳ垃伲点毛豆嘞长生果里“进“出，像好孛相呐啥个，作兴也是日头足烈嘞钻垃里乡阴凉点。横来著么足贯畀点食Ͳ吃吃，横鸡皮、鸭油、虾壳落嘞些儿足贯有个。乡下头递点好，人吃剩下来个物事横鸡嘞、鸭嘞、狗嘞、猪猡嘞thin侪好吃个，一样也不豁脱。
有一日我吃好饭抬著碗骨头嘞壳落嘞跑到场上，只狗朽垃个车子底下望好垃许。我呼Ͳ过来，Ͳ不肯，有点吓丝丝，还想跑嘞。乃我索解不去呼Ͳ啧，拿点垃圾去场口上株鸡脚辣茄边头一ghuah就进去啧。只狗看我进去啧，乃么“笃笃笃笃”跑过去吃啧。我立垃灶下间窗盘里望好垃许。歇著歇儿我跑到阳台上望下去，只狗还塱啀嘞。动物吃物事个辰光看看蛮苦恼个，nyi牙咧嘴，啀嘞嚼，啀嘞嚼。求生个本能塱吃物事个辰光也是一个集中个体现。Gah实人theh动物也一样个，佷不相留心好，去看看看两个人吃物事呶，嘴一迸一迸，也侪见苦恼个。人么本来也就是动物呀！当然递个有点话笑啧。
除脱仔飞禽走兽，当然还有游鱼。呒不浮薸个上，常庄看见巷巷尽尽个鱼，特别是有场时落雨前头，作兴气压低，齐鲦鱼嘞排侪游到水沿面啧，兴透兴透！就算平常脚大点个鱼侪钻垃底下，沿面也有巷尽巷是个小毛鱼。怪不得水鸟、猫儿嘞thin各路神仙侪要到递个上来吃大餐。Ͳ፲若然也会像人恁请客个说话是肯定日朝喊著两个鸡朋狗友来戳祭。
总数，屋里门前头是一个生机勃勃个世界。塱城市日益扩张个今朝，有能拥有寔恁一爿天地，作兴也是一种福气。
疁·浏河长江
2013-8-22 礼拜四
农历 癸巳年 七月十六

果然听不太懂