可怕

首做男一劇網民籲罷睇 森美獨家剖白：尊重每一個人諗法
去年嘅社會運動，森美多次有感而發，亦曾試過喊住做電台節目！由他處男擔正嘅無綫新劇《過街英雄》將於下周一晚八時半首播，有網民要求TVB停播，甚至發起罷睇行動。對於首部男一劇捲入顏色風波，森美表現平靜：「我唔係一個政K，我尊重每個人嘅諗法。」採訪：方騫平 場地：The Code 服裝：Blaack
在TVB 14年，森美終於等到做男主角，新劇《過街英雄》其實已拍畢兩年，本安排於上年尾播出，由於當時社會氣氛緊張、警民關係欠佳，不利踩界題材，所以改播洪永城及湯洛雯主演嘅《丫鬟大聯盟》，而《過街英雄》先安排於海外推出。
全靠羅蘭姐點醒自己
今年終安排劇集於暑假黃金靚期播出，估唔到又有罷睇暗湧，對於有政見不同嘅網民的激動行為，森美有話要說：「其實由寫故事到拍攝至出街，係經過編劇、編審、監製等多重審視，套劇係唔涉及任何政治，只係講正義感，作為藝人做好自己工作就得啦。」他又以前輩羅蘭姐作例子：「做藝人有時好擔心角色同自己有冇衝突？曾經請教過羅蘭姐，佢就話『自己係虔誠天主教徒，但又拍好多鬼片，呢啲只係關於工作職業，唔代表係本人。』呢個都係前輩教我嘅諗法，我覺得真係好好。不過，每個人都有自己嘅睇法，唔可以將自己一套睇法去迫人認同，我又唔係一個政客，如果我係一個政客，我梗係想你跟我啦！如果唔係嘅話，都冇必要因為大家諗法唔同而唔開心，我尊重每個人諗法。」

學習唔傷感情的爭拗
過去一年嘅社會運動令森美有所啟發，「大家學懂一樣嘢，就算阿爸同子女、兄弟姊妹都可以有唔同睇法，如果因為咁而憎咗大家，一聽就知道件事係有唔啱啦！爸爸同個仔諗法唔同，唔通就冇父子做咩？我覺得呢個諗法真係唔應該。」森美還說就算唔講政治，屋企大小事都可以有爭拗。「好似買部電視機，揀大細都有得拗，問題係點樣喺爭拗過程中唔傷及感情，呢啲就係要學習嘅地方。」問他有否信心和平解決得到唔同立場爭拗？森美答得堅定：「香港人冇嘢係解決唔到嘅，我對香港人有信心。」
避開撞子孫根而拗柴
森美在新劇中，有場戲要他從小型貨車頂跳落嚟，再用腳叉住動作演員個頭落地，其間發生拗柴裂骨意外，森美講返呢件意外都覺得幾好笑：「本身係好安全，但第一次拍時我個褲頭揩咗落動作演員個鼻度，我個重要部位好痛，對方就好陰功，佢個鼻對住我嘅子孫根。所以第二Take就一就，落腳時唔啱位，踩咗落塌塌米中間，隻腳攝咗入去拗柴，哈！我終於講到動作演員好威嘅一句：『冇事，唔緊要，拍埋佢！』」

【過街英雄】翠如BB攜手森美上演港女賤男版老鼠俠？
Hi～新朋友，记得关注我们哟
過街英雄
萬眾期待嘅《過街英雄》終於係TVB開播啦！被譽為壓箱寶劇，新聞爭議不斷！劇集未播先熱！大家都好關注尼部劇究竟講乜？等小編帶你睇睇港女毒男版《蜘蛛俠》！
周星馳嘅《大內密探靈靈發》電影中曾經有過一句名言：——
“高手是必要靚仔有型？只不過係你啲星斗市民一廂情願嘅諗法！”
無錯，今次我哋部《過街英雄》嘅主角就係森美飾演嘅咁樣一位——甩皮甩骨嘅英雄大俠——老鼠俠！

森美飾演嘅唐亮星（小名星仔）原來係八卦雜誌記者，專門用各種賤格手段做八卦新聞，內容色情暴力抓人眼球！樣樣都有！
佢一家亦都有曬佢Ｄ基因，阿妹唐美芬Ella（江嘉敏飾）係典型嘅“港女”，拜金又虛榮，最大願望係穩到個富二代可以唔使憂！
“做人最緊要有夢想”，後尾囡囡ELLA真係識到個死心塌地嘅富二代隋俊偉（周志康飾）。究竟佢係咪真係可以釣到金龜婿？
賤精兄妹嘅老竇唐樹根（于洋飾）同阿媽元麗芸（盧宛茵飾）不愧係賤精基因嘅鼻祖，最鐘意都係偷呃拐騙同佔人便宜。

搞笑拐騙招數百出，簡直可以話係電視劇版嘅《情聖》（1991年周星馳同毛舜筠飾演嘅電影）！
同森美飾演嘅阿星完全唔同，正義嘅夥伴就係我哋嘅翠如BB啦~黃翠如飾演嘅宋凱甄原本係女警官，但係因為不畏強權連份功都無埋！
好彩佢仲有個由細一齊玩到大嘅靚女契妹明卓淇（譚凱琪飾），一直安慰佢！星仔（森美飾）超級鐘意淇淇，成日想鹹鹹濕濕去溝女，搞到愛護妹妹嘅凱甄（翠如BB飾）好火滾！
凱甄（翠如BB飾）亦有一個好養父明君毅（張國強飾，亦係凱甄契妹嘅親生Daddy），仲係網媒總編添！於是乎，介紹埋翠如BB去做私家偵探。