.

唔介意千嬅过档 
黎明叹无缘准备放人 
03/02/2009 
文： 音乐组 
黎明同杨千嬅成日传唔啱牙，近排仲传千嬅年尾约满就过档。寻日黎明率领Amusic搞新春团拜，咁啱千嬅又冇到，难怪黎明都话：「入一间公司唔会一世嘅。」 
寻日卫兰、卫诗、应昌佑同雷颂德等朝早九点几陆续返Amusic，同老板黎明搞新春团拜兼拜神，但千嬅偏偏冇影。公司话佢放紧假，问佢系咪唔喺香港？黎明话：「冇问喎！（系咪唔畀面？）绝对唔觉！呢啲嘢好自由、好西化嘅！（放假庆祝生日？）佢攞咗最受欢迎女歌星奖，新正头梗系忙啲嘅，唔勤力下年点再攞？」 
唔讲嘉欣有喜 
有传千嬅年尾约满就过档姊妹公司，黎明搵自己嚟做比喻：「我都由宝丽金去咗Sony先再到Amusic，有缘分就会留低，入一间公司唔会一世嘅，对我嚟讲我唔介意，佢唔喺Amusic大家都系朋友。」 
讲起旧爱李嘉欣近排传有喜，黎明话死都唔讲：「呢啲我梗唔会八，就算佢同我报喜都唔会同你哋讲，做朋友有道义，但真系冇听佢讲过。」至於女友乐基儿话冇试过逗佢利是，黎明即刻话：「做乜畀利是佢？（女友会好似老板娘咁派利是？）绝对唔会，否则到时系人都伸手问佢攞利是。」卫兰今年新年有假放，同阿妹卫诗带埋班宠物去西贡行沙滩，点知猫咪兴奋过头，唔觉意抓伤咗阿妹额头。