像「無bo、餓鵝俄go、哥ko、刀道to」裏面這個聽起來很像er的韻母o，在臺羅裡能寫做or嗎？
臺羅拼音可不可以寫做「無bor、餓鵝俄gor、哥kor、刀道tor」

這个韻母-o，雖罔至少佇漳泉片閩南語的無仝口音當中，有無仝的實際語音，
毋過佇咱人話音系，是共通，而且佇個別口音內面，嘛是仝音位(phoneme)。
就準講其中有腔口，佇-o韻毋是發做[o]，是發做[ə~ʏ]音的口音內面(我的口音)，
嘛無分音辨義的功能，嘛佮-o韻母是發做[o]音的口音，
攏仝款干焦佮 -oo 韻母構成對立爾爾。
就仝款拼寫做-o，就好矣。按呢，咱這个語言內面的無仝腔口音的人之間，
嘛會當透過拼寫來相通，知影是佗一个韻，佗一个詞素。
按呢就著矣。嘛較著。
台羅拼音系統，雖罔字母符號規定佮國際音標誠接近，
毋過，台羅是拼音，拼寫音位的拼音系統，毋是複雜的國際音標。
佇反映一个語言整體佮個別口音的音韻系統，伊的制式拼音系統內面，
若欲干焦為著有仝音位的異體音爾爾，煞就欲加一个無仝款的符號，
彼毋但是夯枷，而且嘛是予本底會當上大面積相通表達詞素的
拼寫法，實質是仝音位仝聲韻的表示法，煞閣加一種形式出來。
彼毋但是無必要、是夯枷，嘛毋著矣。
台羅拼音，毋是複雜的音標。
雖罔有人、有所在，共彼个韻母按呢拼寫，但彼毋是正式的臺羅拼寫法。
毋通按呢拼寫。
若欲表現家己的實際音(phones)，欲表現家己口音的特色，請用國際音標；
抑若無，現代科技蓋進步，請錄音、發家己講話的錄音語音，彼上有特色，
全世界唯一無二的特色。

我計著o，感覺寫or無必要。

無定著樓主，抑是另外有朋友，會問講：為啥物台羅會專門
替泉府音加設計像講 -ir 佮 -er韻母符號？
替漳州音加設計 -ee韻母符？
敢若是咧特別優待這兩種腔口仝款。
毋是特別優待。
彼是因為，佇泉府音的系統內面，
-ir 韻有佮 -u韻(抑是-i韻)，有分音辨義的作用，構成對立，是無仝音位；
er韻有佮 -e韻(或者 -ue韻) 構成對立，有分音辨義的作用，是無仝音位；
啊若漳州有的口音內面，-ee 韻有佮 -e韻構成對立，是無仝音位。
無定著閣會有問講：
若按呢，啥物叫做有分音辨義的作用、構成對立、無仝音位?
簡單來講，就是
有管無仝字。
也就是講，頂面有舉例講著的，佇泉府腔口內面，或者漳州腔口內面，
彼幾个構成對立的韻母之間，佇各自的腔口內面，
有管無仝字。
所致有必要另外設計符號。
啊若 o- 所代表的韻母，毋管發做[o]音的腔口，抑是發做[ə~ʏ]音的腔口，
佇咱語言(至少佇閩台片主要腔口)的整體佮各腔口本身，袂有構成對立的作用。
而且是會當予各腔口直接相通的，構成仝語素/仝字音來相通的韻母標寫符。
所致，當然無閣另外設計符號的道理。
閣再強調一遍，
台羅，毋是複雜的國際音標。毋通佮台羅當做國際音標，欲提伊來表現家己語音特色，一人想一項就欲添一點，彼就會是揣毋著所在、捎毋著工具，做毋著工課矣。