乐基儿融化Cool爆天王 黎明顺得人帮手扑水 06/09/2008 人人都话自从黎明同乐基儿拍拖之后，成个人都唔同晒，变得后生同活泼好多。SoSo姐仲记得黎天王以前一向Cool爆，但唔知系咪因为照顾得女友多，依家就变到笑面迎人兼和蔼可亲，仲好识照顾人同幽默感爆灯添！所以SoSo姐都话爱情魔力无边，都咪话唔信！ 风趣幽默识人 好似早前黎明出席公开活动，因为天时暑热，热到SoSo姐同个个记者都身水身汗，而黎明见到我个个大汗叠细汗，就好识照顾同体贴人，主动拎水畀记者饮，仲要好细心咁递埋杯畀人，到做访问时，黎天王虽然依然「金句」不离口，但明显地「金句」难解度同九唔搭八度大为下降，至少我SoSo姐都听得明佢想讲咩。 期间黎天王有求必应、有问必答，答得鬼咁风骚幽默之余，仲破天荒亲口讲「乐基儿」三个字，佢好抵死咁话：「我黎明今日都讲『乐基儿』两次，你今日有功课交啦！」临走时黎明仲企埋身同记者讲拜拜，见到佢心情咁好，SoSo姐真系深深体会到乐基儿威力，有拖拍人，真系会唔同晒！